Furðulegt hátterni hunds um nótt

Það er eitthvað skrítið á seiði í CCAA heiminum þessa dagana. Eitthvað mjög skrítið. Þegar við byrjuðum í þessu ferli fyrir langa, langa löngu var skilvirkni þess eitt af því sem mér fannst mest treystandi. Einfalt, auðskilið og allir fara í sömu röðina sama hvaðan þeir koma úr heiminum og sama hversu mikla peninga eða hversu frægir þeir eru: 1. Þú sækir um 2 Umsóknin er send til Kína 3 Kína sendir LID dagsetningu sem segir þér hvenær kemur að þér. 4 Eftir X langan tíma færðu ef allt gengur, vel upplýsingar um barn. Í þessu ferli er tímabreytan það eina sem ekki er hægt að segja til með vissu því margt sem getur komið inn í á þeim tíma. Síðan við sóttum um og hófum ferlið hefur allt sem hægt er að gera til að seinka ferlinu gerst. En það er allt önnur Ella og kemur þessu máli ekkert við.
Ég er búin að fylgjast með þessu kerfi síðan í mars og tel mig orðið vita bara allnokkuð um það hvernig þetta allt virkar og fram að þessu hefur kerfið verið eins og sagt var í upphafi: Einfalt og traustvekjandi. Ég hef að vísu ekki skilið leyndardóminn sem ríkir yfir upplýsingum og hvenær vænta má svara en ég skrifa það bara á menningarlegan mismun og reyni að hemja gremju mína (sérstaklega erfitt fyrir manneskju eins og mig sem er upplýsingaóð). Síðustu mánuði hefur samt eitthvað verið að gerast sem hefur hrist aðeins í trúnni á kerfið óskeikula. Þetta eru aðalega þrír þættir:

1. Í ca ágúst fannst starfsmönnum nóg komið um leka frá stofnuninni og að fólk úti í heimi vissi að upplýsingar væru að koma áður en þær voru sendar af stað. Lokað var því fyrir alla leka og nú veit enginn neitt fyrr en ca 2 dögum áður en upplýsingar koma. Enginn veit hvaða dagar eru innifaldir í upplýsingum fyrr en upplýsingar birtast á heimasíðu CCAA og þar er ca 1-2 dögum eftir að upplýsingar berast. Þetta gerir það að verkum að fólk bíður í ofvæni eftir því að vita hvort það er með í þetta skiptið eða hvort það þarf að bíða lengur. Mjög skrítið en OK hvað á ég svo sem með að segja að þetta sé skrítið.

2.Október upplýsingar innihéldu tímabilið 9-25 ágúst. Hinsvegar var fullt af fólki með LID 24 og 25 ágúst sem fékk EKKI upplýsingar. Maskínan fór þegar á fullt við að reyna að finna út hvað væri í gangi en ekki er hægt að spyrja stofnunina sjálfa að því því hún svarar ekki svona tittlingaskít. Niðurstaðan var sú að flestir hefðu lent í því að hafa fengið auka spurningar einhvern tíma á ferlinu sem þurfti að svara og það hefði fært LID þeirra aftur um einhverja X mánuði. Enginn veit hversu langt aftur því þetta flokkast líka undir spurningar sem ekki má spyrja. Enda alveg skiljanlegt því hvað kemur okkur það svo sem við þó dagsetningin sem við höfum mænt á í 14-15 mánuði sé svo bara alls ekki rétt?

3. Nóvember upplýsingar innihalda 26 ágúst til 8 sept. Sumar af fjölskyldum voru skildar eftir í október fengu upplýsingar núna, en ekki allar. En það sem er skrítið er að LID 10,12 og 14 sept fengu upplýsingar núna. Engin skýring, því hverjum kemur svo sem við einhverjar smá breytingar verði? Það sem er skrítið er að hjá sumum þeirra sem eru í þessum hópi þá eru fjölskyldur hjá SAMA umboði sem eru með LID 9 sept en fengu ekki upplýsingar.

Ég veit ekki með ykkur en þegar ég frétti svona þá fer trú mín á kerfið óskeikula að riðlast og ég veit ekkert hvað ég á að halda. Ég er með LID 14 Nóv. Get ég treyst því að þegar kemur að þeim degi að ég fái mínar upplýsingar eða fæ ég þær fyrr eða það sem verra er, fæ ég þær seinna? Ég fór inn á eina síðu hjá RQ sem er með LID 10 sept og þar skrifar konan þá á GUÐLEGA FORSJÓN að þau hafi fengið upplýsingar mánuði fyrr en reiknað var með. Það er gott og blessað en hver er guðlega forsjónin yfir þeim sem eru á undan henni í röðinni en fengu ekki sínar upplýsingar? ARG ARG ég verð svo pirruð þegar ég les guðleg forsjón þetta eða hitt en er samt auðvitað glöð yfir því að konan er búin að fá upplýsingar. Ef þið farið inn á RQ þá er þetta síðan sem heitir Our little Flower og hún er með LID 10 sept sem er TVEIMUR dögum á eftir því sem lokadagsetningin er. Finnst engum það skrítið?????